Foto: MV_ZOE
Oifach so hen mir entschieda, dass mr em Oktober, wo oifach nix los ischd, no ebbas uff d’Fiaß stellad. Oiach so hot no dr. Bautrupp om dr. Ginter rom zwoi Zelt uff s’Backhäuslesplätzle en Zell gschdellt: Ois fiar d’Ute mit ihrem Mo ond Brezzla, dia drogga bleiba missad ond ois fiar d’sensible Musiker ond dia no sensiblere Inschdrument, dia koi Wassr vertragat, hechschdens Bier, abbr des gab’s net, war eh z’kalt. Onser Fuchtler aus em Allgai, Aushilfsdirigent Joseph, der hot nemme ens Zelt neipasst ond hot draussa standa missa. Isch net schlemm, der isch eh teflobschichtet. Oifach so hot mr fiar d’Gäscht Bänk uffgschdellt. A Dach hen dia net braucht, dia hen Decka ond Regaschirm khet. Oifa so hen mir no zwoi Schdündla Schdändle gschbielt, mol wieder ellas, was em Joseph so gfällt, ond dem gfällt ellas. Oifach so hot dr Sommer am Sonndich uffghert ond s’isch oifach em Oktober pletzlich April worra. Deswega hot oifach so d’Klarinett a Sitzkissele braucht ond dr Schüttler hot sein Shaker uff dr Posaunischda gschmissa. Dem isch an dr Backa dann au glei wärmer worda. Oifach so war des a schehs Feschdle trotz dera Kälte ond dem Rega. Oifach so dankat mr elle, dia komma sen und dia au gholfa hen. Des macha mr nägschd Johr wieder: Oifa so !