Foto: MV_ZOE
Am Sonndich goht’s frisch drocknet weiter. Dr. Ofang machet onsre Nochbor aus Altbach. Onsere Stammkappell besetzt so lang d’Ständ. D’Altbächer lockat mit Subbr-Musi die hongrige Altstadt-Wetzer en dr Schwörhof. Heidaschduagart ! Dia hend älle geschdrig nix zom Essa ond Drenka kriagt ond reißat ons d’Wiarschd ond d’Häls vom Grill, d’Kriag aus de Händ ond dr Oi oder Andere mecht am Liabschda en d’Frittös neihopfa. Mir kommet net henderher. Waaahnsinn aber klasse ! S’Höfle isch voll, d’Altbächer hend a guats Publikum ond älle freiat sich. Om Drui fängt d’Stammkapella o ond dr Hof bleibt voll bis om Sechse. Jetzt missat mir leider uffhera ond dia Leit auskehra, gern hättet mir noch dem geschdriga Wasserfall-Samschdich no weiter gmacht. Goht halt net. Also guat: No pack mr dr ganze Krempel halt wieder ei. Des goht ziemlich schnell, weil ganz viele mitgholfa hend. Dankscheeh ! Ruckizucki isch ellas en Garasch ond Proberaum ond noch ma Abschluss-Bierle ond -Wurschsalätle kennat mr älle froh ens Bett. Dankscheh an älle Helfer, onsre Freind vom MV Bad Urach ond MV Altbach, dr Jugend mit de sauguade Waffla ond de ganze Gäschd. Bis nägsch Johr. Scheh war’s.