Foto: MV_ZOE
Zwoitas Juliwochaend: Schwörfeschd ! Sauber ! Des wird schdressig ! Samschdich en dr Friah om Siebene: viele Händ, schnelles End ! Ruckzuck stoht ellas, d’Kapell aus Urach ischd au pinktlich, d’Ständ send besetzt, los goht’s ! D’Uracher lockat vial Leit en dr Hof, d’Stimmong isch subbr. Läuft ! Nach de Uracher spielt onsre Jugend. Au klasse ! D’Leit bleibat do ond herat de schene Kläng ! Jetzt no a Siegerehrung vom Fuaßballtippspiel ond do drauf d’Stammkapell ! Nach onsere zwoi Vorbands isch des a gmähts Wiesle, sott mr moina. Mir legat au guat los, d’Gäschd hend a Freid … … ond uff oimal lacht dr Hemmel Dräna ond hert nemme uff ! Die Hartnäckigschde bleibat sitza ond herat ons no zua, wie mir ellas gebbat. Aber dr Monsum woicht ons langsam uff. Wo isch dr Mose zom Meerdoila, wenn mr ihn braucht, oder Noah ! Komm bitte mit dr Arche ! Hilft ellas nix ! Noch de sechse hera mr notgedrunga uff. War trotzdem scheh. Vielleicht wird’s morga besser ! Guts Nächtle. Dr. zwoite Doil no nägschd Woch.